«Әр ГАЗЕТ менің жалғызым»

Ақтөбе қаласында 3G қосылуға байланысты баспасөз мәслихатына біз де бардық. Елден ерекше болып, бірінші келіп отырып алыппын. Менен кейін «Керек.инфо» газетінің өкілі келді. Ұйымдастырушыларға «Ақтөбедегі жалғыз қазақтілді басылымбыз» деп таныстырды. Рас, «тәуелсіз жалғыз газетпіз» деп түзеп қойды. Санаулы минуттардан соң, «Ақтөбе» газетінен де әріптесіміз жетті. «Ақтөбедегі қазақ тілінде жазатын жалғыз газеттенмін» деген сарында өзін таныстырды. Абырой болғанда, қазақтілді «Айна-Ақтөбе», «Табын», «Арайлы Ақтөбе», «Нұрдәулет», «Ұстаз», «Шежіре», «Ықтияр» деген басылымдардан өкілдер келмеді. Әйтпегенде, төбелес болып кетер ме деп қорықтым. Бірақ қай-қайсысының да өз газетін дара, жалғыз санайтыны… көңілге медеу. Біздерде газеттеріне осылай беріліп, әрі онысын дара газет деп санайтындар бар… Әсте бір, «әр газет менің жалғызым» дегенге бергісіз…

Құпиясы көп кәрі құрлық…

Еуропа Қауіпсіздік және Ынтымақтастық Ұйымы жанындағы Демократия және адам құқықтары бюросы өткізген кезекті семинар сот жуйесі мен сот әділдігін атқаруға арналды. Оған ЕҚЫҰ-ның қазіргі төрағасы Қазақстанның атынан барған делегация қатарына бізге де енудің сәті түскен-ді. Сапар барысында көрген-білген, көзіміз шалған жайттармен бөліскіміз келген.
Әуежай жерге жақындағаннан-ақ мұнда тәулік бойы жауынның толастамай тұрғанын аңғару қиын болмады. Мамыр айы болса да қоңыр салқын күн райы кәрі құрлықты қызықтауға кедергі бола алмады.